Axmedova Dilrabo. Sergey Yesenin

 Sergiy Yesenin rus adabiyotining eng nozik qalbli va eng ta’sirchan lirik shoirlaridan biri sifatida tanilgan. Uning ijodi mehr, dard, sog‘inch va tabiatning sehrli go‘zalligiga boy bo‘lib, turli yoshlardagi kitobxonlarni o‘ziga jalb etadi. Yeseninning she’rlari inson ruhining ichki olamini, muhabbat va yolg‘izlik o‘rtasidagi kurashni nihoyatda samimiy tarzda aks ettiradi. Uning satrlarida sokin tonglar, oltin kuzlar, qorga burkangan qishloqlar va o‘sha manzaralar ichida yashayotgan insonning qalb holati juda nafis tasvirlanadi. Shoirning ovozida tabiat bilan insonning bir-biriga uyg‘unligi, ularning ajralmas bir butun ekanligi yaqqol sezilib turadi.Yesenin qishloqda tug‘ilib o‘sgani sababli, uning ijodida qishloq hayoti va dehqonning mehnatiga bo‘lgan iliq munosabat alohida o‘rin egallaydi. U o‘z she’rlarida bolalik xotiralari, yerning hidi, o‘tloqlarning shiviri, otlarning yeli kabi o‘ziga xos unsurlarni yorqin tasvirlaydi. Bu tasvirlar orqali u o‘quvchini bolaligidagi yorqin tuyg‘ulariga qaytaradi. Yeseninning she’rlari shunchaki manzara emas, balki qalbni uyg‘otadigan tirik tasvirlar majmuasidir. Uni o‘qiganda go‘yo shamolda shitirlab turgan barglarning ovozi, bahor yomg‘irining hidi yoki kuz osmonining sokinligi sezilgandek bo‘ladi.Shoirning hayoti murakkab kechgan bo‘lsa-da, u butun borlig‘i bilan she’riyatga berilgan edi. Uning ijodida shodlik va qayg‘u yonma-yon yuradi. U muhabbat haqidagi she’rlarida insonning beg‘ubor hislarini shu qadar samimiy aks ettiradiki, kitobxon o‘zini o‘sha tuyg‘ular girdobida his qiladi. Yeseninning yorqin satrlarida insonning ehtiroslari, sevgining nozik lahzalari, ayriliqning og‘riqli iztirobi va yana qaytishiga umid bor tasavvurlari mujassam.Yeseninning adabiyotdagi o‘rni juda beqiyos. Uning she’riyatida musiqaviylik, ritm, ohang va so‘zning tabiiy ravonligi uyg‘unlashgan. U har bir satrni yurak bilan yozgan, har bir she’rida esa o‘z ruhini ifoda etgan. Shu bois uning asarlari o‘quvchi qalbiga bevosita kirib boradi. Shoirning ijodini o‘qigan har bir kishi o‘z ichki olamiga nazar soladi, o‘z tuyg‘ularini anglaydi va quvonch yoki sog‘inchni qayta his etadi.Bugungi kunda ham Yesenin she’riyati o‘z qiymatini yo‘qotmagan. Uning satrlari butun dunyo bo‘ylab sevib o‘qiladi, she’rlaridan qo‘shiqlar yaratiladi, uning hayoti va ijodi haqida kitoblar yoziladi. Bu esa shoirning unutilmas ijodi, uning so‘z qudrati va yurakdan chiqqan satrlarining kuchidan dalolat beradi. Yesenin o‘zining qisqa, ammo yorqin hayoti davomida adabiyot olamida chuqur iz qoldirdi. Uning she’rlari bugun ham qalblarga nur olib kiradi, inson ruhiga taskin beradi va sevgi, tabiat, hayot haqidagi eng nozik tuyg‘ularni uyg‘otishda davom etadi.