Prezident sun’iy intellekt sohasini rivojlantirish bo‘yicha yangi rejalarni e’lon qildi

 Shavkat Mirziyoyev sun’iy intellekt (AI) sohasini jadal rivojlantirishga qaratilgan qator yirik tashabbuslarni e’lon qildi. Unga ko‘ra, Nvidia kompaniyasi bilan hamkorlikda superkompyuter klasteri ishga tushiriladi, AQShning Kremniy vodiysida Milliy transfer ofisi ochiladi, maktab, kasb va oliy ta’lim tizimlariga sun’iy intellekt fanlari bosqichma-bosqich integratsiya qilinadi.

Prezident ma'lum qilgan rejalariga ko'ra, O'zbekistonda sun'iy intelekt ekotizimini barpo etish bo'yicha qator yo'nalishalarda ishlar amalga oshiriladi.

Nvidia kompaniyasi bilan hamkorlikda superkompyuter klasteri ishga tushiriladi. AQShning Kremniy vodiysida Milliy transfer ofisi ochiladi. Barcha hududlardagi “Kelajak markazlari”da sun’iy intellekt bo‘yicha maktab o‘quv dasturi joriy qilinadi.

Maktablar o‘rtasida har yili sun’iy intellekt yo‘nalishida eng yaxshi startap g‘oyalari bo‘yicha tanlov o‘tkaziladi. Har bir hududda g‘oliblikni qo‘lga kiritgan maktabda eng zamonaviy AI laboratoriyasi tashkil etiladi. AI bo‘yicha Prezident tanlovi tashkil etiladi. Har yili 100 nafar eng iqtidorli yosh saralab olinib, AQSh, Birlashgan Arab Amirliklari va Yevropaning ilg‘or texnologik kompaniyalariga stajirovkaga yuboriladi. 

Prezident yoshlarni qo‘llab-quvvatlashga qaratilgan yirik tashabbus – “5 million sun’iy intellekt yetakchilari” loyihasiga ham start berilishini ma’lum qildi. Unga ko‘ra, 2030 yilga qadar 4,75 million o‘quvchi va talaba, 150 ming o‘qituvchi, 100 ming davlat xizmatchisi sun’iy intellekt asoslari bo‘yicha o‘qitiladi. SI fanlari maktab, kasb ta’limi va oliy ta’lim tizimlariga integratsiya qilinadi. Har yili noyabr oyi “Yoshlar uchun sun’iy intellekt oyligi” deb e’lon qilinadi. Doimiy ravishda “Ipak yo‘li sun’iy intellekt forumi” o‘tkazib boriladi.

Prezidentning ta’kidlashicha, ushbu tashabbuslar yosh avlodni zamonaviy raqamli ko‘nikmalarga ega, global raqobatbardosh kadrlar sifatida shakllantirish, shuningdek, O‘zbekistonni mintaqa­dagi yetakchi sun’iy intellekt markazlaridan biriga aylantirishga xizmat qiladi.