Zotero.org haqida.💢

 Zotero.org haqida.💢

    Men ilmiy manbalar bilan ishlash jarayonida eng ko‘p foydalangan vositalarimdan biri bu Zotero bo‘lib, u menga manbalarni yig‘ish, tartibga solish va avtomatik ravishda bibliografiya tuzishda juda katta yordam beradi. Zotero — bu bepul, ochiq manbali bibliografik menejer, ya’ni ilmiy manbalarni boshqarish va ularni to‘g‘ri havola qilish uchun yaratilgan maxsus dastur. Men uni kompyuterimga o‘rnatib, internetdan topgan istalgan maqola, kitob, sayt yoki PDF faylni birgina bosish orqali Zotero kutubxonamga qo‘sha olaman.

    Zotero o‘zining brauzer kengaytmasi orqali har qanday ilmiy maqola yoki kitobni avtomatik tanib oladi. Masalan, Google Scholar, JSTOR yoki ResearchGate’dagi maqolalarning muallifi, yili, sarlavhasi, DOI raqami va hatto PDF’ini ham avtomatik saqlab beradi. Bu menga manbalarni qo‘lda yozib chiqishdan ancha vaqt tejaydi. Saqlangan manbalarni men osonlik bilan papkalarga ajrataman, teglar qo‘shaman, izohlar yozaman va kerak bo‘lsa, PDF ichida chizish, belgilash va yozish ham mumkin.

    Menga yoqqan yana bir jihati — Word va Google Docs bilan to‘liq integratsiya qilinishi. Ilmiy ish yozayotganda men matnga “Add citation” tugmasi orqali havola kiritaman, va hujjat oxirida bibliografiya tizim tomonidan avtomatik yaratiladi. Havola uslubini (APA, MLA, Chicago va boshqalar) bir zumda almashtirish imkoniyati ayniqsa juda qulay.

    Zotero bulut xotirasi orqali barcha manbalarimni onlayn sinxronlashtiradi. Shuning uchun kompyuterimni almashtirsam ham, barcha manbalarimni qayta tiklashim juda oson.

    Albatta, ba’zi kamchiliklari ham yo‘q emas. Masalan, bepul bulut xotirasi 300 MB bilan cheklangan, ko‘p PDF fayl saqlasam tez to‘lib qoladi. Ba’zan avtomatik tanilgan ma’lumotlarda xatoliklar uchrashi mumkin, lekin ularni qo‘l bilan tahrirlash orqali oson tuzataman. Shunga qaramay, Zotero men uchun eng ishonchli, bepul va qulay ilmiy manba boshqaruv tizimi bo‘lib qolmoqda.

Sizning savol va izohlaringiz biz uchun qiziq. Ularni kamentariyada kutamiz. Muallif: Uchqunbek G'ulomov. E'tiboringiz uchun tashakkur!!!